Балалар үшін қызыққа толы «Балауса» сауықтыру лагерінің жаз маусымы да басталып кетті

  Ағымдағы жылдың 5 маусым күні Тұрар Рысқұлов атындағы №20 жалпы орта білім беретін мектебінде балалар үшін қызыққа толы «Балауса» сауықтыру лагерінің жаз маусымы да басталып кетті. Мұнда арнайы кітапхана, спорттық орындар орны жабдықталып, «Оқуға құштар мектеп», «Сказки- добрые друзья», «Funny English», «Табиғатты аяла» атты экологиялық және «Волшебная мастерская», «Ертегілер елінде», «Дойбы», «Дебат» үйірмелері жұмыс жасайды.
«Балауса» лагерінің ашылу салтанаты үлкен сән-салтанатпен жоғары деңгейде өтті. Мектеп директоры Н.Мырзаханов, аудандық білім бөлімінің әдіскері- С.Метеркулова «Балауса» сауықтыру лагерінің ашылу лентасын салтанатты түрде қиып, бүлдіршіндерге ізгі ниетін білдірді. Шара барысында мың бұралған қыздарымыз би билеп, «Балалық шақ», «Достарым менің золотой», «Ақбұлақ» әндерін біркелкі ерекше үйлесімде орындап шықты. Мұның бәрі балалар мерекесінде есте қаларлық және ұмтылмас сәттердің біріне айналары анық. Мереке соңында «Балалық шағымның базары-құт мекенім Меркі» атты аз қамтылған отбасынан шыққан оқушыларға қайырымдылық акциясы ұйымдастырылып, «Ойтал» ауылдық округі әкімшілігі атынан тегін балмұздақтар тарту етілді.